كرفان ولا موترهوم ولا آرفي… شنو الفرق؟

كرفان ولا موترهوم ولا آرفي؟ أكيد سمعت بهذي المصطلحات من قبل و بالنسبة للكثير يعتقدون ان لهم نفس المعنى، هذا صح و غلط بنفس الوقت! شلون… خلني أوضح لك أكثر.

خل نرجع شوي للخلف و نبدأ من الدول اللي تصنع الكرفانات نفسها. بشكل عام عندنا:

1- الولايات المتحدة الأمريكية:

الشعب الأمريكي ما يستخدم مصطلح كرفان (caravan) لكنه يستخدم كلمة آرفي (RV) لكل أنواع الكرفانات. يعني لو كلمت شخص أمريكي و قلتله أبي اشتري كرفان فيه احتمال كبير انه ماراح يفهمك. لكن اذا قلتله ابي اشتري آرفي (RV) فهني راح يفهمك و بعدها يسئلك السؤال المهم…. أي نوع آرفي (RV) تقصد؟

لأن كلمة آرفي (RV) تشمل كل أنواع الكرفانات و احنا تكلمنا عن أنواع الكرفانات في مقالة اذا حاب تشاهدها اضغط الزر في الاسفل.

يعني هي تشمل الكرفانات السحب و بعد الكرفانات السيارة. لكن حط في بالك الكرفانات السيارة يسمونها بعد موترهوم (Motorhome).

شوف معاي هذي الصور حتى تتضح أكثر:

الكرفان اللي بالصورة في الأعلى يسمونه في أمريكا آرفي (RV). لكنه بنفس الوقت هو كرفان سحب من نوع اللي شرحناه في المقالة السابقه اسمه (Travel Trailer).

وهذا الكرفان بالصورة في الأعلى بعد اسمه آرفي (RV) في أمريكا. لكنه من نوع الكرفان السيارة و لذلك بعد يسمونه موترهوم (Motorhome).

خلاصة الموضوع….عندنا كلمة آرفي (RV) تشمل:

• الكرفانات السحب:
  • Travel Trailer
  • Fifth Wheel Trailer
  • Folding Camper
  • Truck Camper
• الكرفانات السيارة اللي اسمها بعد موترهوم (Motorhome):
  • Motorhome Class A
  • Motorhome Class B
  • Motorhome Class C

تمام الحين… الموضوع بسيط في أمريكا… كلمة كرفان مو موجودة في مصطلحاتهم…. فقط عندهم كلمة آرفي (RV) و موترهوم (Motorhome).

وللعلم كلمة آرفي (RV) هي اختصار لكلمة (Recreational Vehicle) و بالعربي تعني سيارة ترفيهية.

2- الدول الأوروبية:

في الدول الأوروبية أهم ما يستخدمون كلمة آرفي (RV) ولكنهم يستخدمون مصطلحات:

• كرفان (Caravan): اللي هو الكرفان السحب فقط
• موترهوم (Motorhome): اللي هو الكرفان السيارة

نوضح أكثر بالصور التالية:

هذا الكرفان بالصورة في الاعلى يسمى في الدول الأوروبية…. كرفان (Caravan). لكن في أمريكا يسمى آرفي (RV) و ايضا (Travel Trailer) لأنه من هذا النوع.

اما الكرفان هذا فيسمى في الدول الأوروبية موترهوم (Motorhome). و هو ايضا يسمى في أمريكا الموترهوم (Motorhome) لكنه بنفس الوقت يعتبر من أنواع الآرفي (RV).

الخلاصة:

تكلمنا في هذي المقالة عن الفرق بين مصطلحات كرفان و موترهوم و آرفي و بيننا أن الفرق يرجع للدول نفسها اما أمريكا او أوروبا. وهذا أول و أبسط اختلاف بينهم و باذن راح نتطرق أكثر للاختلافات الاكبر بين الكرفانات الامريكية و الاوروبية في المقالات القادمة. شكرا لكم و اتمنى أن أكون وفقت في توصيل الفكرة بأبسط طريقة ممكنة. و اذا عندك اي اقتراح تو تعليق تفضل تقدر تذكره بالتعليقات تحت او ارسل لنا ايميل او راسلنا عالخاص في حسابنا الانستجرام rvsouqcom@

مهتم تتعلم اكثر عن أنواع الكرفانات؟ هذي اهم الأنواع تقدر تتعرف عليها من خلال الضغط على الرابط في الاسفل.

وفرنا لك كتالوجات أهم الشركات المصنعة للكرفانات، اضغط الزر في الأسف لمشاهتهم.