التوسعة في الكرفان (Slideout) ايجابياتها و سلبياتها

التوسعة في الكرفان او ما يسمى بال(slideout) هي ميزة منتشرة كثير في الكرفانات الامريكية. شكلها فعلا مميز من الخارج و ايضا من الداخل تعطي مساحة اضافية كبيرة و تغير في التقسيمة الداخلية للكرفان بشكل كبير و هذا بالتالي يعطيك كرفان مريح اكثر و شعور بأن حجمه أكبر.

لكن حط في بالك ان هذي المميزات الجميلة ايضا يصاحبها عيوب لازم تكون واعي فيها. اذا قدرت تسوي اجراءات الصيانة اللازمة و عرفت كيف تستخدم ميزة التوسعة بشكل صحيح فراح تستمع أكثر بكرفانك.

لكن أول شي شنو يعني توسعة (Slide-out)؟

هي ببساطةعبارة حائط متحرك و تقدر تحركه للخارج حتى تزيد من مساحة الكرفان الداخلية. لكن ما يصير تسحب الكرفان بهذي الحالة فلازم ترجعها للداخل مرة ثانية و بعدها تقدر تسحب الكرفان. و كل هذا يصير بلوحة تحكم بسيطة و بضغطة زر…. مثل الفيديو في الاسف.

هل التوسعة تتوفر على كل الكرفانات؟

الجواب باختصار لا. هالميزة تعتبر نادرة في الكرفانات الاوروبية اللي تكون غالبا خفيفة و لأن التوسعة تزيد من وزن الكرفان فهم يتجنبونها و ايضا لاسباب اخرى غيرها. أما في الكرفانات الامريكية فهي منتشرة بشكل كبير و تقدر تلقاها في كل الأنواع مثل:

1- Travel Trailer

2- Fifth Wheel Trailer

3- Folding Camper

هذي النوعية نادر تحصل فيها هذي الميزه لكن هذي صورة تبين طريقتها.

4- Truck Camper

5- Motorhome Class A

6- Motorhome Class B

7- Motorhome Class C

هل التوسعة فقط تكون على الجانب؟

لا ممكن تحصلها في الخلف ايضا و تسمى (Rear slideout)

مميزات التوسعة (Slideout):

1- تزيد المساحة الداخلية للكرفان و بنفس الوقت تغنيك عن الحاجة لكرفان طويل و ضخم حتى تحصل على المساحة اللي تحتاجها

2- تزيد عدد النوافذ في الكرفان مما يزيد من الاضاءة الطبيعية داخل الكرفان و يكون مريح للعين أكثر

سلبيات التوسعة (Slideout):

1- تحتاج صيانة و عناية خاصة لأنك بالتأكيد راح تواجه اعطال و مشاكل و لازم تعرف كيف تتصرف معاها. راح نتكلم عنها أكثر في موضوع قادم.

2- التوسعة في الغالب يكون فوقها مثل مظلة متحركة (Slideout Topper) تخرج و تدخل مع حركة التوسعة. وهي معرضة لتراكم الغبار و الوسخ فوقها و ايضا الماء ممكن يتجمع فوقها لما تكون التوسعة مفتوحة. واذا ما كنت تدري عنها و قررت انك تدخل التوسعة للداخل فممكن الماء يدخل معاها الى داخل الكرفان و يسبب مشاكل اخرى. و ايضا وقت الرياح الشديدة ممكن تنزعج من صوته بسبب الرياح.

3- تسرب المياه هي أكبر مشكلة ممكن تواجه الكرفان و لأن التوسعة فيها الكثير من القطع المتحركة و الفراغات و العوازل المائية اللي ممكن تتلف فهي معرضة لأنها تتسبب في تسرب الماء للداخل و لذلك تحتاج اهتمام و صيانة.

4- أغلب الشركات المصنعة يحاولون يوفرون في التكاليف و خصوصا في الفئات الرخيصة عندهم فيصنعون التوسعة من غير أي عزل حراري. وهذا يؤثر على حرارة الكرفان الداخلية و يزيد من الجهد على جهاز التكييف.

5- بسبب الفجوات اللي ممكن تكون موجودة في التوسعة بسبب الاهمال او عدم الصيانة قد يكون المكان المناسب لدخول القوارض داخل الكرفان مثل الفئران و غيرها.

6- التوسعة تزيد من وزن الكرفان بشكل كبير. و لذلك توقع انك تحتاج سيارة أكبر لسحب الكرفان او مكينة أكبر في الموترهوم و هذا راح يزيد التكاليف.

7- التوسعة ما تحتمل انك تخلي عليها احمال ثقيلة و اضافية عن اللي تم تصميمها لها. و هذا قد يسبب اختلال توازن الكرفان خصوصا اذا كانت التوسعة من جهة واحدة.

8- لما تكون التوسعة غير مفتوحة ممكن تكون المساحة الداخلية ضيقة و يصعب عليك استخدام الكرفان. خصوصا في الموترهوم لما تكون في رحلة على الطريق و تحتاج الذهاب لدورة المياه اعزكم الله لكن بسبب أن التوسعة غير مفتوحة فالمكان ضيق و ماراح تقدر توصل لها بسهولة.

9- ممكن تزيد الوقت المطلوب لتجهيز الكرفان لما توصل لمكانك المطلوب. هي قد تكون خطوة واحدة اضافية فقط لكن لازم تحسب حسابها.

لكن هل التوسعة تعتبر ميزة سيئة و لازم تتجنبها؟

الهدف من ذكر كل هذي السلبيات حتى تكون عندك صورة أفضل و تعرف كيف تختار الكرفان المناسب لك و تتجنب المشاكل. لأن فيه الكثير من كرفانات اللي فيها توسعات تستخدم اجهزة و الكترونيات أفضل و تكون معزولة عن الحرارة و الماء بشكل أفضل و أيضا الكرفان يكون مصمم من الداخل بحيث ما يكون ضيق لما تغلق التوسعة و هذا كله يعتمد على اختيارك.

ختاماً…..”الوقاية خير من العلاج”

أدري أن مرحلة البحث عن كرفانك الجديد يكون فيها تعب و توتر بسبب الكم الهائل من المعلومات اللي لازم تعرفها. لكن مهم تعرف أن كل ما عرفت أكثر عن الكرفانات راح يسهل عليك اختيارك و راح تسعد أكثر بكرفانك و رحلاتك. و اذا حاب تتعلم أكثر عن الكرفانات تابعنا عالموقع و ايضا تابع حسابنا في الانستجرام (@rvsouqcom) حتى توصل لك كل مواضيعنا الجديدة المختصة بعالم الكرفان. حياك الله و تشرفنا بزيارتك و احنا بخدمتك.

لكن شنو الفرق بين كلمة كرفان و موترهوم و آرفي؟ هذا شرح مبسط بيننا فيه الفرق بينهم تقدر تضغط على الرابط في الاسفل لمشاهدته.

وفرنا لك كتالوجات أهم الشركات المصنعة للكرفانات، اضغط الزر في الأسف لمشاهدتهم.